GAC KA TI LEH THIN ANG….GAC

A chhan chhiarsenloh Sawmsarih avangin GAC kha ka ngai thin. Mi chi hrang hrang, dinhmun leh khawsak dan in ang lo tak tak leh mize in ang lo pui pui kan han fuan khawm a. Vawikhat class kal fuh ve tum a thawm nei hat hat theite an awm laiin, athen kumtluana class kal ve si, a class-puite ngei pawhin an hriat mang lohte leh Lampui chang khata tawh chang pawh a mi’n an melh liam ve mai mai ngai loh tur, mipui sahawk pawh hnarthei tur khawpa hmeltha leh zun paite an awm laiin, ‘A pu ro nen lam pawh sawn a nakruh bo zawng
dawn ta se, a hmu zo lo mai ang a’ tih mai tur khawpa hmaifanga duhsakna dawng ve lote inchiahpiahin tual kan han chai za thin kha a nia…! Kan lung a rual thei phian zelte kha thil mak tak chu a ni.

Tun hnua Rinngheta nen phone atanga kan inbiak fuh chang a, a engamah hma a, ‘Lily par ti vul leh la a ni mai a lawm…’ a rawn ti tham tuak zel ka hriat hi chuan ka thian duhtakte(Da Marl..!!) nena kan inhmelhriat dan ho lutuk kha min hriat chhuahtir thin. An Mawza hralh theih tawh loh kha min lei luih tir nita berin ka hria. Mahse a hnu lawk atang kha chuan an tello chuan kimlo tlat nia inhriatnate kha ka nei a. Nia kan inpawh tlang hlawm bawk a, khawi ilo vah chhuahnaahte khan kan inzui ang tham tham a. Mizoram Economics dinhmun ngaihtuah lek lova Restaurant-a an han ei thinte kha a nia lawmawm ni. Vawk nise vulh atan an itawm dawn em a sin…! Lily, Mam leh Chhanite phei kha chu Chatuan rorelna Niah pawh an sual zep rukte hailang ve mah se Pathian hmaah an insawifel thei thovang tih tur khawpa an Hnar hnuaia an ‘Ka’ hmang thiam leh thiante rilru tur pawh sawi chhuak thei khawp a rilru chak an lo ni bawk nen. Mamuani leh Debbie lah khawilama Chhas nei hmeltha ber niawm ziazangin an lo khi var var thei reng a. Leh lam han hawi phei ila Ram Nitla-seng-lova roreltu tur niawm fahran a SL-i leh Azauvite lo inla pawrpawleng vel kara Arinliani leh Rinkimite lo tawng siam siam zel ngaihthlak kha chu ninawm lo deuh a sin. Nia an bula khawsak kha ka kham lova, nitin hian ka ngai zual thin ni berin ka hria.

IIyr kan nih kum a, Adventure Club-in Rih Dil kan tlawh tum a thianpa Faka chet ‘Hero’ dante kha ania a fate hrilh hlan ka nghah hlelh chu(h)…! Kal lamah kha chuan Khualpang zin khan a’n thlengthla ve mai bawk a, let lamah erawh Khuallian emaw a’n ti aniang chu, zawn loh chi ni tawh hek lo i, tute emaw tlawmngaiin Bus an rawn zawn thleng thei hram a. Kha kha chu ka la hre thiam, mahse Seling dai atanga Rihdila a chapal theih nghilh(a theih nghilh tak tak emaw ni…?) la tura min han tir zet kha zawng, a thar leina tur leh a Taxi fare nen lama pek mai kha a chakawm a, Pathian a tha a, hei tun thleng hian eng em ala tilo chu ania, college aiawha boxing ka khelh tum a, ka tumpui pa’n duhtawk awm miah lova min chum hnua Hahmai kim biai chunga ‘Ring’ ka la chhuahsan theih avanga Pathian hmaa lawmthu ka sawi nasat tluk zet khan Pathian hmaa lawmthu sawi mawlh mawlh tur chu a ni ve in ka hria.

GAC ‘Sekibuhchhuak’ kan buaipui laite kha mitthlaah hian a chamreng thin. In thlahrung takin thiante computer kha kan han hmang a, Zara’n chhangkhawro tawh tak kha thingpui hmeh atan a rawn paipawn lut ngei a. Chutah zan dar 12 velah, ‘atlai tawh em mai, ti hian tawk mai teh se..’ kha kan han ti dawih aw tut a, a neituten inhawng takin, ‘A la hma alawm hmanhmawh suh u..’ rawn ti tawng kam tha thin mah se, vengkhata pa darben tan pawh ‘a hma tawh lo a ni’ tih kha chu hai rual va ni suh, ‘A leh pek atang chuan mawi hnai zawkin kan ti tawh ang…’ kha kan ti kumtluan nita berin ka hria.

Editorial te kha a hman hmanin kan ziak emaw ni. Kei pawhin vawikhat chu ka ziah ve kha mawle. Kan hmuipuipu ber Rinngheta hming ‘Pa Rina’ tia kan chhuah palh(luih) tuma a thinrim ziate kha aw..! hmaisen tawn chungin, ‘Ka pawtthller vek mai dawn ami chu le…’ a’n tia. A thuziak tawplam, ramhnuk khawih pha tawh lo tur tlar thum vel alo bo palh avanga a lung nih loh dante, kan her chhuah vek tawh sa kha min her that tir leh teuh ziate ka ngaihtuah let chang hi chuan ka nuih a za letling thin. A, ani kha zawng, ‘Na a hre ve lovang a…?’ tih tur khawpa tuang chhah leh a thawt at palh chang pawh a, ‘Khuate U….?’ Min ti duh tur ang chi hmel kha a pu reuh a, a tawng chhuah ve chang hi chuan a thiante kha kan kimki chawih chawih Ni berin a lang.

Khang hunlaite kha nimin lek emaw tih mai tur hian mitthlaah chiang takin a rawn lang thin a, mahse tunah zawng a thente chu phone-a inbiak chang pawhin ‘Pa han nih tawh hi chuan…’ tih bak a thunawna hmantur tawng kam thar an chherchhuak ta lo. ‘Pa i nih tawh chuan i nupui thuhnuaiah i kun tur a ni’ tih ziakte hi an lo hmu bik emaw ni. Nia thiante GAC khualnek atan pawha sitawm lo tak tak kha nupuite hlau reng reng a, nau hmathlak chunga Hmunphiah an han chuh tur hi ka ngaingam lo a ni deuh e, engtikniah emaw chuan, ‘Nupui nei ila vuak na chang hre ta miah lo ila ka tan enge sawt ang..?’ tih thu thawn nia ka duh ni. Mahse keini zawng thianpa Zara nen ‘Ka leng tar awm chuang lo.’ kan la ti kum Sawmnga leh pathum ve dawn anih hi maw..!

Aw GAC bawk kha…! Room chhung thutthleng aia step ngaina zawk tlatte tualchaina hmun kha…! Engtikniah emaw chuan Ball sep aia khabe sep thiam zawk Lalhmingthanga khabe liam ngaithla a, Corridor-a kan nuih ho dar dar laite kha khuarei an la chang ve dawn si a, engtin tak ngai ve hlawm ang i maw….!

Tunah chuan tuanna mualte alo dang ta, Maffaka te paw’n fapa kaiin inchhung khur an luah lum tawh a, Sk-a leh Finga te pawh darfeng pawlah an lo tang ta reng mai. Rinngheta pawh, ‘Dan(Law) a zir a, mi hnial a thei tawh khawp mai’ tih bak a chanchin hriat alawi kan nei ta lo. Thianpa Hlimpuia MPS nih tum pawh ‘Nupuiin neiin a pasaltha khawp e..?’ an lo ti bawk nen. ‘Nang i hmunah kei ka hmunah’ tih hla ang deuh khan mahni awmna hmun hmunah mahni buai buaiin kan buaita. Mahse anni pawhin kan hlimlainite, midangte hlimna aia Chuan hnuai bik lo tak kha an dawn kir ve thin ang a, ‘An lung aleng ve ngei ang…..’ tih erawh ka chiang.

Fur leh Thalte lo inher danglamin hmangaihte huat pawh hlawh thin mahila; thianthaten min phatsanin chhungte tuithlar hial pawh tawk mah ila, retheihnain ka banah min vuanin hrehawmnain ka kawng sial thin mah se kei zawngin "GAC ka ti leh thin ang….GAC"

(He article GAC ka chhuahsan tawh hnu, 2008-a ka ziak a nia a, Annual Magazine ami tur thianten rawn ziak ve rawh an tih avanga thiam leh thiam lova ka ziah a nih hi)