'Nang Ngaih Banzai Ka Rel Mahna'

Mami of Birmingham

Duhtak, thla ruk lek kalta atanga kan inhmelhriat dan kha han ngaihtuah kir ve mah teh.?Nun beidawngin ka in dawm kun a, tanpui ka ngai tih i hria a, min rawn tanpui a nih kha. Mahse,khatihlai khan ka thian chhar thar hian beidawnna ruam atanga min hruaichhuakin, tahna leh lungngaihna ruamah min hnuk lut dawn a ni tih reng ka lo ngaihtuah ngai lo.

Hmelthate vanneihna khawvela kan chen miau avangin, midangte tana lungngaihna khawvel hian, i tan hlimna kawng a sialsak thin che a, dawnsen rual loh malsawmnaa vurin i awm thin a nih kha. I hlimna parzu dawn dun a thenrual dang pawh ngai lova kan nuih dun laite kha han ngaihtuah kir ve mah teh? Sylvia, nang zawng lenrual zawng zingah chulram derhken par ang maiin i langsar a, Vohbik nihna i hmelah a lang hliah hliah thin a nih kha. I thatna leh nungchang mawina te khan, i thian englaimaha fak mawina awka dawng ve ngailo kha dinhmun sangah min din tir a, i ropuina lallukhum min khumtir a, phut let nei miah lovin ka chungah thatna leh ngilneihna i lantir thin a nih kha! Mihringin a mihringpui hnena a thilpek hlu ber “Thian hmangaihna” chu dawn sen rual lohin min hlan thin a nih kha mawle...

“Hmelthatna leh nungchang mawina inkawp chu khawizu sehhmeh a tana kurtai chhawp anga thil inhmeh lo a ni” titute lei leh ka chu i lakah phuar beh a ni a. I hmelmawina hmutute chuan Siamtu kut themthiamzia an hre chhuak thar thin asin. I tan chuan van sanga chhum leng vel delh delh te leh, Zotuithiang luangri her her te pawh khian an nihna an hawh ui lova, Leitlangpui Dingdi te leh Norway parmawi ber Thelma-te pawh khan hringnun bul tanin he khawvelah hian par rawn chhuah leh pawh ni se, I hmelmawina an hliahkhuh bik hian ka ringlo.


Duhtak, I thian nih tlinglo zet hian i chunga thil tha ka tih sawi ve tur ka va han nei lo tak em..!Nang chuan tawhsual ka tawh i hlauh a vangin chu thil chu i tel lova hmachhawn lo turin min ti a, ka inrin hmain ka lo hmachhawn a, ka tlu bawk sawp a, nang chuan lainatna in min tungding leh thin a nih kha. Ka dam chhung pawh a ka rulh zawh loh tur thatna leh ngilneihna ka chungah i lantir a, ka hnena,“Hringnun hlutna I hriat duh chuan hlimin nui la,tap thin rawh” i tih te kha ka bengah hian a rawn ri nawn awn awn thin a sin..! Nia Sylvia, nangmah avangin hringnun hlutna ka hre chhuak thar thin a ka lawm tak zet a ni.


Ih maw, kan thiannu damlo kan tura class kan off ni kha ila hre reng em? Thawmhnaw sendukin i rawn inthuam a nih kha. I mawizia leh I inhmehzia kha hrilh che ka va han chak tak em..!Nang pawhin nalh I in ti viau a nih kha tiraw?Khami ni atang khan a lawm thian hmangaihna nilo hmangaihna dang hruihrual ka lo vuan reng tawh a ni tih ka hriat ve chauh chu. Duhtak, khuanu remruat dan hi a mak thin tiraw? i thian, i ngainat em em-a khan i rin loh lutuk hmangaihna hruihrual dang ka vuan ta si, mahse i rilru hliam ka hlauh a vangin ‘ka hmangaih che a ni’ tih hi hrilh ngamlo che in keimah chauhin ka hre thin a sin. Engtinnge ka phuloh hmaah ka in phawrh mualpho ngam tehlul ang ni? A ni reng asin, duhtak, ral ram indonaahte chuan pasaltha tam tak tirh liam an ni thin a, indona mual a ngenmu leh hliam tuar rum rite karah pawh zam miah lova ralrel theite chu pasaltha chhuanvawr, huaisen filawr an ni thin asin. Mahse keizawng he indona mualah hi chuan ka ding ngamlo a ni ber mai.


Ti chuan maw Duhtak, hmangaihna hrui hrual inanglo tak, engtiklai maha suihzawm theih ngai loh tur vuana hringnun kan hman dun laite khan nang chuan hmangaihna thianghlim leh bawlhhlawh kailo khan min kaihruai a, hlobetin chawmtu zing daifim a mamawh ang hian ka nun hian a mamawh ngawih ngawih che a ni tih nang pawhin i hriat kha. Thiante phatsan leh chhungte tui thlar hial ka tawh lai pawha ka inhnemna awm chhun chu maw ka thian duhtak, min tanpui turin ka bulah nang I awm reng dawn tih ka hre si.

Hunpui a inher danglam a, par mawi ber te pawh hian chuaini an nei thin. He kuta sak loh In, kan taksa pawh hian chuaini a la nei ve dawn a ni. Chawrno ve ngailo hringfate hringnun hi a lo va mak ngai em..!!!Buh chi thehtu chuan hlim leh lawm takin a buhphal te a la khawm a, mahse hmangaihtu thinlung erawh tihnatin a awm thin si. I laka ka thuruk pawh hunin a rawn hai lang ta si a nih kha. Nia ka thinlunga luangliam hmangaihna chu ka thiante ka atanga luang chhuakin I hnen a lo thleng ta si. Kha thu I hriatni atang khan i hmel hlim thei tak a rawn danglam a, hrehawm ka va han ti tak em, nangpoh ka lak atanga in thiar fihlim i tum nghal a nih kha. Pawi ka va han ti tak em!Engatinge kawng dang kan zawn mai loh le...?

Kei zawng hmangaihna hi ka hrethiamlo a ni..!Mi tam tak, hmangaihnain nghet taka a suihzawm tawhte chun leh zua avanga thenhranin an awm thin a. Mahse thenkhatte erawh chuan hmangaihnaa khawvel thar din an tum laiin karah palai sual an len avangin an fukna phehchhiatin a lo awm thin si. Mahse Duhtak, nang leh keia in karah hi chuan chun leh zua an hrang lova, palai pawh lei ang an sual hek lo. Chuti a nih si chuan khuannu hian inkawprem ngailo turin min lo ruat zawk em ni lo ni dawn le....??

Ka thian Sylvia, ka lak atanga bibo hlen tura phur hlan i siam ni kha han ngaihtuah kir ve mah teh, Sept 6 ni a nih nghe nghe kha. I hnung lam atangin ka au lawm lawm che a, mahse chhanna ka hmu si lo. Min kalsan hmaa i thusawi,`Nangmah avang hian lungngaihna chirhdup zau takin min hual vel asin` i lo tihte kha tunah chuan vaukam lam panin i lo pen chhuak ve dawn ta a, hlimna chuan lo hmuak mawlh che rawh se.

Tichuan maw Duhtak, nangmah chauh lungngaihna chirhdup hmun atanga i inthiarfihlim ni atang khan kei zawng ka inhambuai viau asin. He khawvel hian min hnuchhawn a, chutih laiin nangin min lo bihruksan ta si. I parmawina leh rimtuina hian i lamah thlipui chak tak angin mi a beng lui thin si. I parzu ruiin ka chhia leh tha hriatna te hian mu leh mal a nei thei mawlh si lo. Eng dawidim nge ka thinlungah i phul tak....! I tel lova darkar khat pawh ka awm theih tak loh le? I tel lova darkar khat pawh awm thei lo khan kumkhuaa ka’n then tur che chu(h) ka tawrh nat dan tur chu i hriatthiam ve mai ka ring. Mahse chumi tuar thiam tur chuan ka chhia leh tha hriatna zawng zawng sawm khawmin ka bei ve thin a sin....Mahse nang ngaih ban zai ka rel thei si lo.

Duhtak, kut ni vangthla a lo thleng leh ang a, rual zawngte chu kawp lai `d` nen tudang ngailova nuam tawlin, khawvel dang ngai lovin tual an leng leh ang a. Keizawng i ngai hian ka van leh ruai dawn zawng a nih hi. Tunah te hian nang chu hlimin i leng tawh ngei ang a, nia duhtak, hlim rawh. Hlimna hi i tan liau liaua siam a ni alawm. Mahse nangmah hmangaihtu i hmangaih let ve si loh lungngaihnaah hi chuan rawn in tat lut ve hauh suh ang che...! Hlimna tluantling i neih theih nan Siamtu ke bula thingthi in ka dil awl lo thin asin...! A chhan chu maw, i hlimna hian ka lungngaihna a chhawk zangkhai thin si a....

Engvang khera lo intawng nge kan nih le? Ka tahna ti tamtu mai i ni si! Tunah chuan val dang tangnemah hlim tak leh ngaihngam takin bei la, mahse fam rolung muala i liam hunin, pialralah tal chuan min la rawn zawng chhuak ve ang chu tiraw ? Chumi hunah chuan nangpawhin min hmangaih thu mi hlan ve thei tawh ang a. Lei hrehawm, lungngaihna leh tahna ruama i hnutchhiah i thian, nangmah hmangaih em emtu nen hmangaihna lipui ah in pil dun thei tawh dawn a ni. Tichuan ka tangnemah duatten ka pawm ang che a, nangmah avanga ka tahna mittui chu hlimna mittuiin a rawn thlak tawh dawn a ni.

Tunah rih chuan Duhtak, nangmah avanga ka lunglenna leh khawharnate hi tawrhthiam dan ka lo zir ang a. Mahse, a van har dawn tak em..! Aw Duhtak, ka ngaihtuahna atanga paih bo che a, ka hriat rengna atanga theh chhuah che hi ka va han chak tak em!!! Mahse ka thei ngai mawlh si lo. Chung zawng ai chuan nangmah ngei kha ka hmaah rawn inlarin heltu val rual zinga ka tlin ve loh zia te, i nawmsakna tura sum leh pai chhuan tur ka neih ve loh zia te leh vawi sang sawm pawh lo piang nawn mahla ka tana khuannu ruat i nihloh zia te min rawn hrilh ta che..! Tichuan he ka thinlung, nangmah avanga keh chhe lek lek tawh hi lak tlak awm leh tawh ngai miah loh turin rawn tikeh sawm vek la, khawvel lo la awm leh thleng pawha ka mi huat i nih theih nan...'Tichuan maw, duhlai, nang ngaih ban zai ka rel mahna.

"Kum sarih lai liamta a ka thuziak ka'n chhiarnawn chu, kum sarih kal ta khan hla ka lo phuah thiam reng alawm le tih ka hre chhuak. He ka article bo tawh hnu min rawn pe leuh tu mami chungah lawmhla ka sa e." Lura Hranglungchhung