Marine pa....?

Nurse nula, la naupang tak hian sipai tlangval ngui leh chau tih hriat tak hi damlo thi lek lek bulah a rawn hruai a,

‘Hei le I fapa chu’

Nurse chuan Damlo chautakin a mit a rawn men hmain chu thu chu vawi engzat nge a sawi hman pawh a in hre lo.

Chu damlo, lung lam that loh vanga thi lek lek tawh chuan harsa titak chungin amit chu a rawn meng riai riai a. A oxygen bur bula tlangval la naupang tak, sipai Uniform thuam famkima in thuam tlangval ding chu fiahlo takin a hmu thei ruai ruai a. A kut a phar chhuak a, Sipai naupangte chuan Damlo kut chak lo tak leh vawt tak mai chu hmangaih leh duat tih hriat takin alo vuan nghal vat a. Nurse in chair alo laksak a, sipai chu damlo khumbulah chuan a thu a.

Sipai(Marine) chuan damlo kut chu nghet taka vuanin a bulah chuan a thu reng a, damlo chu kalsan a tumlo tih a hmelah alang chiang hle. Chu Putar chaklo tak, chat thla lek lek tawh kut  vuan chung chuan a hmangaih thu leh, a that chhuah leh vat tur thu te a hrilh mawlh mawlh a. A khat tawkin nurse duty chuan Marine chu reilote tal chawl hahdam turin a rawn ti thin a. ‘Ka theilo alawm’ ti ringawt in Marine chuan a chhang a.

An ward-a a khat tawk a nurse lo lut te, damdawiin bul vel a thawmri bengchheng te, zanlam duty ho hlim thawm te leh damlo dang tap leh rumri te chu Marine chuan a ngaihsak lo kher mai.

Nurse chuan a changa Sipai tawngri leh zauh thin chu a hria a, mahse chu putar thi lek lek tawh chuan thu kamkhat mah a sawi velo. Nghet takin a fapa kut chu a vuan reng ringawt mai a ni.

Zing khawvar hnu chuan Damlo chu a boral a, sipai chuan Putar nunna nei tawhlo kut a vawn chu zawitein a thlah a, nurse hnenah thil thleng chu a han hrilh,  Nurse chuan thil tih tul ang ang te a tih hnu chuan Marine hnenah pawi a tih thu leh a tawrhpui thu te a hrilh a.

Marine-a chuan nurse hnenah chuan, ‘Ngawilawk teh, kha putar kha tunge a nih’ tiin a zawt a.

Nurse chuan mak ti taka Marine chu melh chungin, ‘I pa’ tiin alo chhang a.

Marine chuan, ‘a ni lo, ka pa ani lo, tun hmain ka la hmu ngailo hrim hrim’ a tia.

‘Anih chuan a bula ka va hruai lai che khan ngatinge I pa anih loh thu min hrilh siloh’ Nurse chuan alo tia.

Marine-a chuan, “Nia abula min hruai khan ka pa anilo tih ka hre nghal a, mahse kha putar khan ka pa ang thovin a fapa a ngai ngawih ngawih tih ka hria a, a fapa a bul hnaiah a awmlo tih pawh ka hria. Amaherawh chu ka hmel a hmuh veleh a thlamuang leh hlim hmel ka hmuh khan min mamawh zia kha ka hria a, ka kalsan thei lo alawm” tiin a chhang a.

                      "I laka beisei neitute ti beidawng lo hram rawh'

(He thu ka chhiar a piang hian July, 19, 2010-a min boralsan tu ka pa ka hre chhuak thin, a boral dawn khan a bul hnaiah ka awm silova. Vawiin a thih champha pualin he thu hi ka hlan e)