Bethlehem Arsi kha..!!!

Tun hma leh tun hnu thleng pawha Mithiamte leh Arsi lam chanchin zir mite lu tihaitu ber chu Isua pian laia Arsi lo lang kha eng Arsi ber nge ni ta ang tih hi a ni. Chanchintha dangin sawi lang lo mahse Chanchintha Matthaia ziak kan en chuan chiang takin mifing hoten arsi an hmuhthu kan hmu a ni.

            Rin dang hrang hrang leh chhui dan hrang hrang a awm a, Mithiam filawr tak tak ten Isua pian hunlai vel a Arsi lo lang, Bethlehem arsi nia an rin tam tak a awm a, an zingah in hnialna pawh tamtak a awm a, kan Lal Isua pian hun tak chianglo hi mithiamte lu tihai zualtu leh in hnialna ti tam zualtu leh Bethlehem arsi chhui ti harsa zualtu ber a ni.

            Rin dang hrang hrang leh chhui dan hrang hrang tam tak a awm a.  Chung zinga rindan tlang lawn ber ber chu i han sawi dawn teh ang.

Comet (Simeikhu) : Cambridge University-a Material Science Department-a an Professor Colin J. Humphreys chuan ‘5 B.C-ah Comet a rawn lang a, chu chu Bethlehem Arsi diktak chu a ni e’ ati mauh mai. He Comet hi hmanlai Arsi lam chanchin zir mite leh Chinese-ho paw’n ziaka chhinchhiahin an lo dah nghe nghe a. Colin J. Humphreys chuan a sawi zeldan chuan ‘He Comet hi 9 March - 4 May thleng hmuh theihin a awm a, Isua pawh hi March – May  5 B.C a piang a ni’ a ti. Luka 2:8-9, ‘Zanah an Berâmho an vêng a, Phulah an riahchilh a’ tihlai hi rawn changchawiin ‘Isua hi thlasik laiin a piang lo a, Berampute’n thlasik laiin Beram an veng ngailo, Nipui lai chauhin Beram an veng țhin’ a ti bawk.

Super-Nova  : BC 5 na lai vel khan Chinese astronomer te chuan arsi puak darh ‘super-nova’ an tih ang chi a thlen thu an lo chhinchhiah a. He arsi puakdarh hi a en ber laiin Bethlehem chungzawnah a awm tlat mai a, heihi tamtak chuan Bethlehem Arsi hi ni turah an ngai ve thung bawk. Tin, thenkhat chuan Bethlehem arsi kha arsi them thlawkah an ngai bawk.

Regulas, Jupiter leh Venus :

Mithiam Frederick Larson-a’n Matthaia ziak nguntak a a zirchian hnuin ‘Bethlehem Arsi ni tur chuan Pianna, Lalna leh Juda hnam nena in laichin Arsi an nih angai a ni’ a ti a. Larsona hian heng thilte nena in laichin arsi hi Isua pian lai vel khan alo lang em tih Computer atangin Arsi kaldan vel ngun thlukin a chhui let a, a thil hmuh chhuah chu 3-2 BC khan Jupiter (Planet Lalpa) an tih leh Regulus(Arsi Lalpa) antih te hi vawithum lai an indi (inzawnin an awm) a. Larsona chuan hei hi Isua pian hunlai vel anih a ring nghe nghe a ni.

            Regulus leh Jupiter hi 3 BC, September thla khan an indi a, Jupiter hi kal hrang lehin thla 9 hnu, 2 BC June ni 2 khan, Venus  nen an indi leh a.  Jupiter(Hrangchhuana) hi Hebrai tawng chuan Sedeq antia, chu chu Mesiah sawi nan pawh an hmang thin a, tin, Venus(Chawngmawii) hian hmangaihna leh Chi tha a entir bawk a, he mi te pahnih in di hian Israel te Lal lo piang tur a entir tih Mifing ho khan an hria a niang a ti.

Bibleah lut leh lawk teh ang, Matthaia ziak kan en chuan Mifingte khan Arsi vawi hnih an hmu tih a lang a. (Matt 2:1-2 ‘Khawchhak lamah arsi kan hmu a, Amah chibai buk turin kan lo kal a ni’ anti a. Tin, Mat 2-9 ah chuan ‘Ngaiteh khawchhak lama arsi an hmuh kha naute awmna chungzawn a thlen a a din hma loh zawng an hmaah a kal zel a, tin, Arsi chu an hmuhin an hlim nasa em em a.”) An vawikhat hmuhnaah Lal thar a piang ani tih an hria a, chumi ti lang chiang tur chuan Heroda hnenah, ‘Khawiah nge Judate Lal lo piang chu?’ an va tih nghe nghe kha. Tin, Arsi an vawikhat hmuh kha a lang tawhlo vang vang a, Heroda an va hmuh hnuah chauh an hmu leh a ni tih alang a. An vawihnih hmuhna ah kha chuan an mahni a hruai a ni tih kan hmu a ni.

            Ti chuan Jupiter leh Venus an  indi zawh hnuin Jupiter chuan  zinkawng a zawh zel a, 2 B.C, 25 December thlaah a retrograde-a (Planet ho reng reng hi kan lei atanga an lan danah ni engemaw zat chu khawthlang lam ațanga khaw chhak hawi zawnga kal angin an lang țhin, chumi an in her let lai tak chuan ding reng angin an lang thin). ‘’ Naute awmna chung zawn a thlena a din hmaloh zawng an hmaah a kal zel a…”tih a awm nghe nghe kha. Larsona chuan ‘He a retrograde lai hi Bethlehem chungzawn velah chiah a ni a. Tin, he hun hi mifingte’n Bethlehem chung zawn a Arsi ding an hmuh hun leh Lal thar chibai an buk ni kha a ni ang e’’ a ti a, chu vang chuan ‘Jupiter hi Bethlehem Arsi ngei chu a ni e’ a ti bawk.

“Aw Bethlehem Arsi mawi, eng reng rawh”